ملخص كتاب Money – روب مور

كتاب “Money” هو الدليل اللي هيعلمك إزاي توقف إنك تتعب نفسك في شغلك وتعيش حياة أسعد وأكتر إنجاز، وده بإنك تخلي فلوسك تشتغل بجد عشان تجيبلك اللي بتحلم بيه. خد لحظة عشان تفكر في وضعك المالي، هل انت سعيد بوضعك الحالي؟ لو كنت زي معظم الناس، فانت بتكافح عشان تحسّن من مستواك، الفلوس مش مجرد أداة تجيب بيها اللي بس انت عايزه، لكن هي وسيلة لتحقيق الحرية والسعادة والتأثير الإيجابي في حياتنا.

ده اللي بيتكلم عنه ملخص كتاب Money – روب مور، أكيد سمعت قبل كده إنك لازم تخلي فلوسك تشتغل بدل ما تشتغل انت، ده بيسمحلك تستغل وقتك وطاقتك في الحياة وتعيشها بدل ما تبقى في الشغل طول اليوم، والكتاب ده هيعلمك بالظبط ازاي تعمل كده.

لو كل الأمور متساوية، فانت قادر تستخدم فلوسك عشان تزود سعادتك وتقدر تعمل أكتر من الحاجات اللي بتسعدك.

روب مور

إقرأ المزيد: ليه الناس بتتداول في الأسواق المالية؟

أفضل تلات دروس من كتاب “Money” عن النمو المالي

• اتعلم النمط الصحيح عشان تبدأ رحلة بناء الثروة باستخدام الكلمة الأولى من كل خطوة: VVKIK.
• معرفة قيمة الدخل اللي بتنتجه هتساعدك تزود دخلك في وقت أقل.
• لازم تتعلم تكون صبور عشان تستفيد من الفوايد التراكمية لو كنت عايز تكون غني.

جاهز تتعلم إزاي تزود دخلك وتحسّن جودة حياتك؟ يلا نبدأ!

الدرس الأول: الاختصار VVKIK فيه كل اللي محتاج تعرفه عشان تبتدي إتقان المال وتكسب أكتر منه

الناس الذكية مش بس بتشتغل على تحقيق أهدافها أو تغيير عاداتها، ده كمان بتركز على إنها تبني نظام يضمن نجاحها، بس بنميل إننا نركز كتير على التفاصيل مش على الصورة الكبيرة المهمة، وفي ناس تانية بتواجه صعوبة في التفاصيل بس بتنجح إنها تشوف الصورة الكبيرة المهمة، وعشان تتحكم في فلوسك بشكل كويس، لازم تركز على التفاصيل والرؤية الكبيرة في نفس الوقت، وده بالظبط اللي بيساعدك عليه نظام VVKIK اللي معناها:

1. Vision (الرؤية).
2. Values (القيم).
3. Key Result Areas (KRAs) (المجالات الرئيسية للنتائج).
4. Income-generating Tasks (IGTs) (المهام اللي بتنتج الدخل).
5. Key Performance Indicators (KPIs) (المؤشرات الأساسية للأداء).

شرح اختصار VVKIK

• أول حاجة بنبني رؤيتنا وقيمنا، الحاجتين دول هما اللي هيكونوا زي علامات على الطريق عشان تتأكد إنك بتوصل لحلمك بالطريقة اللي انت عايزها، من المفيد إنك تكتب الحاجات اللي بتهمك أكتر، زي الأسرة، الحرية، النجاح، أو كل دول.

• بعد كده بيجي دور Key Result Areas أو KRAs، الجزء ده بيمثل الحاجات اللي لازم تركز عليها عمومًا عشان تحقق أهدافك، اختار أعلى 3 لـ 7 حاجات هتكون ليها أكبر تأثير في الوصول لحلمك.

• IGTs معناها المهام اللي بتنتج الدخل، وده بيبقى تحت جزء KRAs، دي الحاجات اللي لازم تعملها وهتجيبلك أكبر دخل في وقت أقل، في مهام بتجيبلك فلوس أكتر في وقت أقل، فلازم تركز عليها.

• أما “Key Performance Indicators”، هي الحاجات اللي بتابعها كل يوم وكل أسبوع عشان تعرف انت بتعمل حاجات كويسة ولا في حاجات بتحتاج تحسّن فيها، الكاتب بيقول إن المراجعة دي لازم تبقى موجودة بشكل مستمر عشان النظام كله يساعدك في الفترة القصيرة والطويلة على بناء الثروة.

الدرس التاني: معرفة قيمة الدخل اللي بتنتجه هتساعدك تزود دخلك بوقت أقل

ممكن تسأل ليه الأغنياء بيزودوا ثروتهم كل فترة؟ الحاجة اللي جاية دي هتساعدك تكتشف السبب وازاي تطبقها بنفسك، الحاجة دي مرتبطة بحساب “قيمة إنتاج الدخل”، اللي هي اختصارها IGV. ممكن تحب شغلك الثابت، بس لو حسبت كل الساعات اللي بتشتغلها هتكتشف إن دخلك بالساعة مش كويس، لازم تعرف قيمة الساعة بالفلوس وتحاول تعمل أكتر حاجات بتزود قيمة الساعة دي. عشان تحسب قيمة إنتاج الدخل بتاعك، اجمع كل الفلوس اللي بتجيبها في الأسبوع واقسمها على عدد ساعات الشغل.

ومتقفش عند فلوس شغلك الرئيسي بس، احسب كمان فلوس أي شغل جانبي، مثلا لو بتجيب 1000 جنيه في الأسبوع وبتشتغل 55 ساعة، فقيمة إنتاج الدخل بتاعك هي 18 جنيه في الساعة. الرقم ده هيديك معلومات مهمة جدًا، وهتستخدمه عشان تبدأ تبني ثروتك، لو في فرصة بتقدر تجيبلك أكتر من 18 جنيه في الساعة، متسبهاش، ولو حاجة بتجيبلك أقل، امسحها من حساباتك أو خلي حد تاني يعملها.

الدرس التالت: لازم تتعلم تكون صبور عشان تستفيد من الفوايد التراكمية

تختار 1,000,000 جنيه دلوقتي ولا 0.01 جنيه بيزيد بنسبة 100% كل يوم لمدة شهر؟ في البداية ممكن تحس إن المليون أفضل، لكن الحقيقة إنك هتخسر أكتر من 4 مليون جنيه لو اخترت الخيار الأول. التجربة دي بتوضح قوة الازدياد المركب، لما بتستثمر في البورصة مثلا، فلوسك بتزيد، وكل ما بتحافظ على الاستثمار لأكتر فترة، كل ما الأرباح بتكبر.

فرضنا إنك بتوفر 3600 جنيه كل سنة، وحبيت تستثمر الفلوس دي بنسبة 2% فوق التضخم، هتكسب 3782 جنيه في السنة الأولى بدل من 3600 جنيه لو ماعملتش اي حاجة بفلوسك، وفي السنة العاشرة، هيبقى عندك 43000 جنيه، وبعد 50 سنة هيكون عندك 438000 جنيه، كل ما الوقت بيزيد، الأرقام بتكبر أكتر.

من الأرقام دي، بنقدر نتعلم درسين مهمين:

• الأول: الصبر والاستمرارية في الاستثمار حتى لو بيزيد بشكل بطئ في البداية، أفضل النتائج بتيجي في المدى البعيد، مش في البداية.
• التاني: إننا لازم نراقب إنفاقنا، ممكن يبقى حاجة كويسه إنك تشتري عربية جديدة، بس لو أمكن تجيب عربية أرخص ده أحسن ليك واستثمر باقي الفلوس، في النهاية هتوفر فلوس كتير وكمان الفلوس دي هتزيد بسبب استثمارك ليها.

حابب أقولك

خلاصة حكاية كتاب Money للكاتب روب مور، إنه بيعلمنا إزاي ندير فلوسنا بحكمة ونستثمرها صح، عشان نحقق النجاح المالي ونحقق أحلامنا. الكتاب بيدينا نصائح عملية ومفيدة عشان نقدر ندير فلوسنا بشكل أفضل ونطور نفسنا ماليًا. يعني الكتاب ده هيفيد كل حد بيحاول يحرر نفسه من مشاكل الفلوس ويحقق النجاح المالي.

مهم: دراسة جدوي مشروع كوفى شوب – الارباح المتوقعة منه

ممكن يستفيد من الملخص ده الشخص اللي عنده 27 سنة مثلا وقاعد مبيعملش حاجة في بداية حياته المهنية بعد ما اتخرج من الكلية، ورائد الأعمال اللي عنده 54 سنة وبيحس إنه بيشتغل ساعات كتير، وأي حد بيفكر إن الحرية المالية بتيجي من الشغل المتعب بس.