كتاب “Get Good With Money” هو دليلك لإنشاء علاقة صحية مع الفلوس وتحقيق الأمان المالي، في أوقات كتير بيحصل حاجات مش متوقعة في حياتنا، زي الكوارث الطبيعية والأزمات المفاجئة أو الفيروسات اللي بتنتشر بسرعة تقلب حياتنا 180 درجة، فلو انت بتفكر إن شغلك وبيتك في أمان لازم تعيد التفكير مرة تانية.
أهم حاجة عشان تحافظ على فلوسك هي إنك تبقى واعي لكمية الفلوس اللي بتصرفها.
تيفاني أليش
الحرية المالية هي الحاجة الوحيدة اللي بتضمنلك الأمان ده، عشان كدا لازم الناس يحاولوا يفهموا الأمور المالية ويعملوا ميزانية خاصة، وكمان لازم تعرف نفسك وعادات إنفاقك دي خطوة مهمة تانية للنجاح، متفكرش إن الفلوس بتنتمي للأغنياء بس، أو إن لازم تتعب جامد عشان تحقق أهدافك المالية، هدفك هو إنك تخلي الفلوس تشتغل لصالحك وتستخدمها عشان تتخلص من الضغوط في حياتك، مش عشان تزود الضغوط دي.
خليك في بيئة إيجابية مع ناس بتفكر زيك، وجّمع حواليك كل حاجة تقدر تحقق بيها أهدافك، والكتاب ده هو بداية كويسة في طريقك للأمان المالي.
إقرأ المزيد: ملخص كتاب The Richest Man In Babylon – جورج كلاسون
أهم تلات دروس في كتاب Get Good With Money
- إنشاء ميزانية خاصة هو أساس الخطة المالية الجيدة.
- لازم يكون عندك تمويل شخصي صح ورقم ائتمان كويس يساعدك على تحقيق الحرية المالية.
- الاستثمارات بتساعدك تبني ثروة وبتأمن مستقبلك المالي لحد التقاعد.
الدرس الاول: إنشاء ميزانية خاصة هو أساس الخطة المالية الجيدة
كل حاجة بتمشي على الميزانية، من أول الدكان اللي جنبك لحد الشركات الكبيرة، كلهم بيستخدموا تقديرات مالية، ليه مش تستخدمها انت كمان؟ الميزانية هتخليك أقل في التعرض للإنفاق، ودي خطوة كويسة لطريقك للنجاح المالي، متفكرش في الميزانية بطريقة سلبية، بالعكس هتكون الأساس لمستقبل أفضل، إنك تظبط ميزانيتك وتحافظ على فلوسك اللي ممكن تستخدمها في المستقبل عشان تسافر بيها أو تشتري أي حاجة كنت محتاجها.
البداية إنك تعمل قايمة بكل مصادر دخلك ومصروفاتك، زي اللي بتتعمل في المحاسبة، وحاول تركز على الجزء اللي مرتبط بالمصروفات، وحدد نسبة من دخلك عشان توفرها كل شهر.
ممكن تستخدم تصنيفات عشان تبقى أسهل، مثلا حاول تحط “B” للفواتير و “UB” لفواتير الخدمات زي الكهرباء مثلا، و “C” للمصروفات اللي ملهاش عقود زي البقالة أو المواصلات، لو لقيت إن أول حاجتين “B”و”UB” هي أكبر مصاريفك، ده معناه إن دخلك قليل، ولو لقيت إن المصاريف اللي في “C” هي الأكبر، يبقى انت بتصرف أكتر من الطبيعي.
“تيفاني أليش” بتقترح إنك تعمل حساب للمصروفات الكاش والفواتير وحساب تاني للمدخرات، وحساب للطوارئ والأهداف طويلة الأجل، بس أفضل حاجة تقدر تعملها هو إنك تعمل دفعات الفلوس بشكل تلقائي عشان تتجنب الإغراءات والأخطاء.
الدرس التاني: لازم يكون عندك تمويل شخصي صح ورقم ائتمان كويس يساعدك على تحقيق الحرية المالية
الديون بتكون عبئ على أي حد، الايجار والقروض وقسط العربية وأي التزامات تانية بتوقفك عن تحقيق الحرية المالية، لحسن الحظ في طريقه تخليك تخرج من المشكلة دي، أول حاجة لازم تغير مفهومك عن الديون، اعمل قايمة دقيقة بكل الديون اللي عليك، واتأكد إن فيها معدلات الفايدة، تقدر تبدأ تدفع الديون الصغيرة أول حاجة ودي الطريقة المعروفة بـ “كرة التلج”، وتخلص من الديون اللي عليها فايدة أعلى ودي طريقة “الانهيار الجليدي”.
بعد ما تختار الطريقة اللي تفضلها في التعامل، بيجي الوقت عشان تاخد بالك من نقاط ائتمانك، الديون بشكل عام مش حاجة حلوة أكيد، بس لو استخدمتها بذكاء ممكن تفيدك، مثلا نقاط ائتمانك الجيدة بتساعدك تاخد معدلات فايدة أفضل وبتوفر كتير في المشتريات، خليها أولوية مالية إنك تحسّن نقاط ائتمانك بالدفع في المواعيد المحددة الشهرية، كمان حاول تخفض نسبة استخدام الائتمان لأقصى حد 30% عشان تبني تاريخ ائتماني من غير ما يكون عليك التزامات كبيرة.
الدرس التالت: الاستثمارات بتساعدك تبني ثروة وبتأمن مستقبلك المالي لحد التقاعد
سمعت عن مفهوم الفايدة المركبة؟ “ألبرت أينشتاين” وصفه بإنه من العجايب التامنه في العالم، بيحصل لما تستثمر فلوسك في حاجة معينة والفايدة اللي تطلع تستثمر نفسها بردو، العملية دي بتكون مستمرة لحد ما تبني ثروتك بشكل مضاعف. تقدر تبدأ تفتح صندوق توفير للتقاعد وتستثمر 20% من دخلك كل شهر، الأفضل إنك تضرب مصاريفك في 25 عشان تحدد المبلغ اللي محتاج توصله قبل ما تتقاعد.
ما تسحبش أكتر من 4٪ من فلوسك في السنة وده هيكفيك، ونّوع محفظتك الاستثمارية بين الأسهم والسندات، ولما تحدد مصاريفك فكر في الاستثمار في الباقي، ممكن تبدأ بمبلغ صغير في البداية، لو عاوز تبقى مستثمر نشط وتتحمل مخاطر أكتر، فكر في اختيار بعض الأسهم بنفسك للاستثمار فيها، ولو انت حابب تقلل المخاطر دور على صناديق المؤشرات المتداولة (ETFs) واستثمر فيها عشان تحقق عوايد صغيرة وثابتة.
في نهاية كتاب Get Good With Money
الكتاب ده دليل كويس جدًا عشان تحقق الاستقرار المالي، النصايح اللي بتقدمها “تيفاني أليش” عن التوفير والاستثمار وزيادة الدخل مفيده لأي شخص حابب يستفيد منها، نصايحها سهلة التطبيق وممكن تساعد أي حد متعثر في تغيير حالته، فلو عاوز تحقق مستقبل مالي مستقر، وتغير عادات الإنفاق الخاصة بيك وتستعد للتقاعد فالكتاب ده هيفيدك كتير.
مهم: ملخص كتاب The Wisdom Of Finance – ميهير ديساي
الملخص ده هيكون مناسب للناس اللي بيعانوا ماليًا وعاوزين يغيروا عادات الإنفاق بتاعتهم، والناس اللي بتدور على مصادر إضافية للدخل، وأي حد عاوز يتخلص من الديون ويعمل ميزانية خاصة ويحقق الاستقرار المالي.
