ملخص كتاب Die With Zero – بيل بيركنز

الكتاب ده بيعلمنا إن التركيز على جمع الثروة مش هو الحاجة الوحيدة اللي ممكن نهتم بيها في حياتنا، والأهم إننا نهتم بتجاربنا اللي ليها معنى وعلاقاتنا والوقت المحدود اللي لينا في الدنيا. كلنا سمعنا عبارة “عيش حياة تستاهل”، بس معناها إيه؟ كتاب “Die With Zero” لـ “بيل بيركنز” هيعلمك إن المشكلة بتكون في الجري ورا الفلوس والشهرة والبيت الكبير وكل المعايير التقليدية اللي بنتعلمها، وبتخلينا نضيع أهم أيام حياتنا في قلق وتعب.

في النهاية، كل واحد عايز يكون سعيد، بس بنأجل السعادة وبنفكر إن لو استمرينا في جمع الثروة هنحقق كل اللي عايزينه، بدل ما نشوف الفلوس والشهرة والممتلكات دي كوسيلة للوصول للسعادة، بنتمسك بيها ونركز في المسألة دي، بدل ما نركز على إننا نعيش حياة ليها معنى ونستمتع بيها.

ممكن تسيب فلوس للناس اللي بتهمك، بس الحقيقة الناس دي هتستفاد أكتر لو استلموا ثروتك بدري، بدل من الانتظار لحد ما تموت.

بيل بيركنز

إقرأ المزيد: ملخص كتاب Your Money Or Your Life – دليل الحرية المالية

أهم تلات دروس من كتاب Die With Zero

• اعمل لنفسك ذكريات خالدة، ومتصرفشي كتير على حاجات ملهاش معنى.
• اصرف فلوسك وانت عايش عشان تستمتع بيها وفي نفس الوقت تهتم بأولادك.
• الفوايد اللي بتجيبها من استثماراتك بتساعدك تأمن مستقبلك المالي بسرعة أكبر.

يلا مع التفاصيل ونشوف طرق تساعدنا نعيش حياة ليها معنى وفي نفس الوقت ندخر للتقاعد.

الدرس الأول: اعمل لنفسك ذكريات خالدة، ومتصرفشي كتير على حاجات ملهاش معنى

بصراحة التأجيل مش مجدى والتقاعد المريح ده حلم بعيد، هل الاستمتاع بالسفر وبالفسح فى الجبال وانت في الستينات بنفس الطريقة اللى هتستمتع بيها في التلاتينات؟ من وجهة نظري معتقدش. دي الفكرة اللى بيتكلم عليها كتاب “Die With Zero”، بدل ما تقعد حياتك كلها توفر كل حاجة عشان تقدر تتقاعد، هتستمتع بحياتك وتجرب حاجات جديدة وفى نفس الوقت تستمتع بالرفاهية وتأمن مستقبل مالي مضمون.

أهم استثمار هتعمله هو في نفسك وتجارب حياتك، فكرة الكتاب ده هي إنك تعيش حياة كلها تجارب روعة سواء النهاردة أو في المستقبل، مش محتاج تضحي بمستقبلك المالي عشان تعيش حياة ممتعة النهاردة، يعني اعمل خطة وحوش فلوس لتجاربك لما تكون صغير.

في الحياة مفيش حاجة مضمونة، مش عارفين مدة رحلتنا في الدنيا، فاضمن إنك تسافر لأوروبا وتجرب السفر وتعمل “Skydiving”، أو تعمل أي حاجة بتحبها، متآجلش سعادتك واستثمر في ذكرياتك لما تكون صغير.

الدرس التاني: اصرف فلوسك وانت عايش عشان تستمتع بيها وفي نفس الوقت تهتم بأولادك

المؤلف بيقترح إننا ما نشتغلش من غير مقابل، إيه اللي بيقصده بكده؟ يعني خد مثال على شغلانه عادية في أمريكا بمرتب 19 دولار في الساعة، لو خدت 16,000 دولار من راتب سنة بقيمة 49,000 دولار، هتوصل لمبلغ 770,000 دولار مدخرات عشان التقاعد. يعني لو اتوفيت قبل ما تصرف كل حاجة وعندك 130,000 دولار في البنك، ده بيعادل تقريبًا سنتين ونص شغل مجاني. مش معنى كدا مش إنك تصرف كل حاجة قبل ما تموت، ولا تسيب أولادك من غير ميراث.

إيه اللي يمنعك تديهم فلوس طول حياتك؟ يعني يقدروا يستفيدوا بيها في شبابهم ويعيشوا حياة أفضل، أو يستثمروها في تجارب كويسة، المهم إنك تكون ذكي في تصرفك في الفلوس وتأمين مستقبلك المالي. ادي أولادك الفلوس اللي تريح بالك وأصرف الباقي، ولو خايف من الإصابة بمرض خطير وتكاليفه كتير، الدراسات بتبين إن الأرخص هو دفع تأمين طوال حياتك بدل ما توفر عشان لو حصل وجالك أي مرض.

ده بيديك توقعات مالية أدق، وبيساعدك كمان على توفير الباقي للتجارب ووقت مع الأهل والأصحاب، خد وقتك وحدد المبلغ اللي يناسب أولادك، وبعدين اضمن إنك تستخدم الباقي عشان تستمتع بالحياة وتوفر في نفس الوقت لمستقبلك المالي.

الدرس التالت: الفوايد اللي بتجيبها من استثماراتك بتساعدك تأمن مستقبلك المالي

• في طريقة تستغل بيها فلوسك عشان تقدر تأمن مستقبلك، كل ده بيبتدي بتعلم طريقة الاستفادة من الفوايد اللي بتيجي من الفلوس اللي وفرتها بالفعل عن طريق الفايدة المتراكمة. لما تبدأ تستثمر وتشتري أصول، الفلوس بتزيد بفعل فوايد الاستثمار المركبة، يعني الفلوس اللي وفرتها للتقاعد هتزيد أكتر من النص.

• عشان تستغل الفايدة دي، كل اللي عليك تعمله هو تحويل الفلوس للوسيط المالي اللي اخترته، أو تستثمر في أصول زي البيت أو الشقة اللي هتزيد قيمتها مع الوقت، احسب مصاريفك الشهرية واحفظ الباقي عشان تستثمره في الأصول دي. لما تحوش فلوس للتقاعد، الفلوس دي هتزيد بالفايدة، بعد كده لازم تحسب الفلوس اللي هتحتاجها كل سنة عشان تعيش براحتك وتضرب الناتج بعدد سنين معين زي 20 سنة، ده هو المبلغ اللي هتحتاجه للتقاعد، بشرط عدم وجود تغيرات مفاجئة.

• لما تحدد خطة تأمين صحي هتوفرلك فلوس على المدى البعيد لو حصل حاجة، هتكون عارف قد ايه الفلوس اللي هتحتاجها عشان تعيش براحتك في سنين التقاعد، وبعد كده الفايدة اللي هتزيد بالفلوس دي مش بس هتساعدك في تعزيز السيناريو ده، كمان هتساعدك في إن يكون عندك فلوس إضافية في حالة لو حصل حاجة.

• لو انت عارف تحسب الأرقام دي بنفسك أو مع مستشار مالي، حياتك المالية هتبقى أسهل كتير، كمان هتوصل لرقم نهائي للفلوس اللي باقية عندك عشان تصرف براحتك، ومتحسش بالذنب لو استثمرت الفلوس في تجارب وحياة ليها معنى.

ملخص كتاب Die With Zero

فكرة التضحية بالمتعة الحالية دي عندنا في الثقافة من صغرنا، وبقت شعار للنجاح المالي، بس هل احنا فاهمين الفكرة صح؟ الكتاب بيدرس فوايد إننا نصرف أكتر ونحوش أقل، الكتاب بيكسر الأساطير اللي حوالين فكرة التضحية بالمتعة الحالية والتقاعد المريح. المؤلف بيعلمك ازاي تعيش على ميزانية أقل من دخلك وازاي تستثمر المدخرات اللي عندك عشان تزودها بشكل كبير مع مرور الوقت.

مهم: ملخص كتاب الخطة المالية من صفحة واحدة The One-Page Financial Plan

الملخص ده مهم للشخص اللي بيحس بالتعب والقلق لو صرف فلوس بدل ما يوفر، والشخص اللي عايز يأمن مستقبله المالي، والشخص اللي قرب يدخل سن المعاش ونفسه يعرف مستقبله المالي بشكل أكتر دقة من اللي قبل كده.