محاسبة

يعني ايه تحليل مالي ببساطة؟

من اهم الادوات اللي لازم اي حد عنده بيزنس او عنده اهتمام انه يدخل في بيزنس او حتي يشتري سهم في شركة انه يستخدمها.

التحليل المالي علشان يبقى مقبول وليه لازمة وما نستخدمش الجمله السخيفة “من وجهة نظري” ان الارقام ما بتكدبش! لازم يبقى منطقي ومرتبط ببعضه وفيه علاقة بين المؤشرات والنتائج وبعضها.

التحليل المالي علم وليه قواعد ووظيفته هي انه يجمع بيانات ومعلومات خاصة بالقوائم المالية ويصنفها ويعملها دراسة تفصيلية دقيقة ويعمل ربط او علاقة ما بين البيانات وبعضها عشان يخرج معلومات تفيده اكتر ف فهم الوضع المالي للشركة وادائها قبل ما يبدأ يحط فيها فلوسه يعني بيشوف نقاط القوة والضعف اللي ف الشركة فانت كمحلل بتبص للي ورا الارقام وعشان تخطط ماليا لازم تحلل الاول عشان تعرف تاخد قرار

اما بالنسبة للي بيستخدم التحليل المالي فالمستخدمين كتير وكل مستخدم وعلي حسب احتياجه

يعني المقرضين بيعملو تحليل ائتماني عشان يعرفوا ايه المخاطر اللي ممكن يتعرضوا ليها ف حالة لو الشركة مسددتش اللي عليها يعني بيقيمو الوضع الائتماني وعلي اساس دراستهم بياخدو قرار!!

وطبعا المستثمرين سواء افراد او شركات بيتأكدو من ان استثمارتهم ف الشركة هتعود عليهم بأرباح!!

فهي اداة بتمكنهم من معرفة ايه افضل الاسهم الموجودة اللي بسعر كويس وبتحقق اعلي ربحية

ولو هيحصل اندماج ما بين شركتين فالادارة المالية للشركة المشتركة بتدرس وتقيم القيمة الحالية للشركة اللي هيتم شراءها والاداء المستقبلي ولو هتخطط ماليا هتستخدمه والناس المسئولين ع الرقابة المالية بيستخدموه عشان يتأكدو من عدم وجود انحرافات او اخطاء!!

واي استثمار جديد تدخله لازم تراعي فيه 3 حاجات:

1- لازم تحلل قبل ما تستثمر.

2- مخاطر قليلة.

3- عائد مرضي.

واي عملية استثمار مفيهاش ال3 حاجات دول فهي تعتبر مضاربة واهم عاملين لازم نركز عليهم هما السعر والقيمة، السعر في السوق اللي بتدفعه عشان تشتري سهم معين والقيمة الحقيقية هي اللي هتستلمها لو بعت!

طبعا بيحصل زيادة وانخفاض ما بين الاتنين مع مرور الوقت فضروري نحلل اسباب الزيادة او الانخفاض ليه قيمته قليلة بس سعره عالي عشان كده لازم نركز ونشوف القيمة الحقيقة قبل ما تدفع السعر او حتي تبيع ولو سعر السهم اقل من قيمته الحقيقة كل ما المخاطرة قلت وزادات نسبة الارباح فاللي يهمنا قيمة السهم!

وتحليل البيانات المالية بيتم علي 3 مستويات: اقتصاد – قطاع – شركة

1- دراسة الاقتصاد ككل ادوات السياسات المالية والنقدية معدلات التضخم والضرائب ومستوي البطالة ومستوي دخل الفرد وسعر الفائدة وميزانية الدولة والناتج القومي ده كله هيفرق ف السوق بشكل عام ف يا اما يزود التفاؤل والسوق يصعد او العكس! وفي الحالتين اكيد هيكون ف تأثير علي حركة التعامل علي الاسهم.

2- دراسة ظروف الصناعة ومش كل الصناعات بتمشي علي نفس المستوي هتلاقي قطاع صاعد وقطاع هابط شطارتك انك تحلل وتعرف وتجمع معلومات عشان تعرف انهي صناعة هيكون فيها ازدهار الفترة الجاية وف صناعات بتنمو اسرع.

بتحاول تعرف المبيعات اللي قبل كده والارباح وظروف المنافسة وطبيعة المنتج وحجم الطلب والعرض ومدي تدخل الحكومة وايه تأثيرها !!

3- دراسة ظروف الشركة بتختار عدد من الشركات من نفس الصناعة وبتبدأ تشوف وتقارن ببساطة ان الكيان اللي قدامك لو مش بيكسب هتعيد النظر سواء في تمويله او الدخول معاه في شراكه او استثمار ولو بيكسب بس مش بيكبر فدي برضو مش كويسه معناها ان الكيان ده معندوش خطة مستقبلية انه يكبر واهم حاجة توضحلك الموضوع ده العائد على حقوق الملكية.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى