محاسبة

تحليل القوائم المالية

بعد ما خلاص اطمنت لظروف الاقتصاد واخترت قطاع او صناعة هتستثمر فيها وده طبعا بيكون من خلال دراسة ومتابعتك للسوق بشكل عام بتبدأ تشوف ايه افضل الشركات اللي شغاله ف القطاع ده وبتقارن ما بينهم من خلال القوائم المالية بتاعتهم وبما انك متابع الاخبار الخاصة بالشركات فخد بالك من حاجة الخبر بيقتل الشارت والمستفيد الوحيد من الاخبار الكاذبة دي او الاشاعات اللي بتطلع كل شوية اللي بيقولها او اللي بيخرجها للمستثمرين والاخبار طبعا كتير اوي فضروري تتعلم تغربل الاخبار ومتمشيش مع القطيع وخليك  هادي ف التعامل معاها.

وللعلم “التحليل المالي بيوصلك لنتائج افضل من التحليل الفني”

بإختصار بنحلل القوائم المالية عشان نعرف الشركة اللي هنستثمر فيها صالحة للاستثمار ولا لأ!

وقبل ما اتكلم عن ادوات التحليل المالي هقولك نبذه مختصرة عن وظيفة كل قايمة وطبعا كل قايمة وليها بنودها وضروري تكون عارف كل بند وايه فايدته وسبب وجوده ف القايمة وده عشان تعرف تستخدمه ف التحليل وتشوف ازاي هتستفيد منه؟

اهم 3 قوائم: قائمة المركز المالي – قائمة الدخل – قائمة التدفقات النقدية

المركز المالي ببساطة بتعرفني الشركة ليها ايه وعليها كام،
ونقاط الضعف اللي في المركز المالي هي ان بنودها بتقيم بالقيمة التاريخية اسعارها في تواريخ الشراء ومبتعبرش عن القيمة الحالية او السوقية والاصول طويلة الاجل الغير متداولة من اكتر البنود اللي متأثرة بده وطبعا القيم الحالية ممكن تخلي شركات خسرانة لشركات بتحقق ارباح وتقلب الميزانية وكمان بيدخل فيها التقدير الشخصي في بعض بنودها يعني مثلا صافي المدينون بيتأثر بالديون المشكوك ف تحصيلها وكذلك بالنسبة لإهلاك الاصول الثابتة ف اختيار طريقة الاهلاك،
وكمان صعوبة تقييم بعض بنودها زي العنصر البشري في الشركة.

ام قائمة الدخل فبتعرفك كسبت قد ايه او خسرت قد ايه بيظهر فيها المعاملات الخاصة بنشاط الشركة المصروفات والايرادات والفرق بينهم يا ارباح يا اما خسائر.

والتدفقات النقدية بتعرفك الفلوس جت منين واتصرفت ف ايه وتقدر من خلالها تعرف ايه المصدر الاكبر اللي الفلوس بتدخلك منه تشغيلي ولا استثماري ولا تمويلي وكمان اللي بتصرف فيه يعني بتعرفك ازاي الشركة بتدير النقدية الفلوس بتاعتها.

وطبعا القوائم ده بيكون مرفق معاها ايضاحات والايضاحات دي بيكون فيها تفاصيل الارقام الموجودة ف القوائم دي، يعني بيكون فيها تفصيلة كل بند موجود ف القوائم وكمان السياسات والطرق المحاسبية المستخدمة

وللعلم القوائم ربع السنوية مهمة جدا هي اللي هتعرفك الوضع الحقيقي للشركة هي العدسة المكبرة اللي هتعرفك نقاط القوة والضعف وعادتا الربع التاني من السنة بيكون الافضل والشركات بتحقق فيه افضل نتائج.

بعد ما قولتلك نبذه عن كل قايمة تعالي بقي اعرفك علي الادوات المالية

ادوات التحليل المالي:

التحليل بإستخدام الاتجاهات (التحليل الافقي – التحليل الراسي) – والتحليل بإستخدام النسب المالية والنسب دي كتير وممكن نختصرهم ف 4 نسب

** التحليل الافقي بيسمي بردو بتحليل الاتجاه الفكرة هي انها بتعرفك نسبة التغير ما بين سنة وسنة تانية
يعني مثلا الاصول المتداولة ب100.000 ف سنة 2017 دي سنة الاساس اللي هقيس بناءا عليها وانا عايز اعرف نسبة التغير ما بين 2017 و 2018 بالنسبة للاصول المتداولة هطرح قيمة الاصول المتداولة 2018 من قيمة الاصول المتداولة 2017 واقسمها علي قيمة الاصول المتداولة لسنة الاساس اللي هي 2017 واضربها في 100 هيجيبلي نسبة التغير
،
وممكن اقارن ما بين شركة وشركة تانية ف نفس القطاع واشوف في زيادة ولا انخفاض بناءا علي سنة الاساس دي لكل بند ف القائمة وطبعا لازم توحد الفترة لما تيجي تقارن يعني متقارنش سنة بشهر لازم توحد الفترة سنة بسنة او شهر بشهر

طيب سؤال وليه نعمل مقارنات؟

عشان اقدر اعرف التغير اللي حصل ده حصل فجأة ولا ف اسباب للتغير ده وايه التطور اللي حصل ف بنود القوائم ف فترة معينة.

** التحليل الراسي وبيسمي بردو بالتحليل الثابت وده عشان بيكون تحليل لسنة واحدة بس
بتمسك القايمة من دول وتعملها تحليل بتعرف نسبة كل بند من الاجمالي بتاعه، يعني مثلا لو عايز نسبة النقدية من اجمالي الاصول كلها هتقسم النقدية علي اجمالي الاصول هيقولك نسبة النقدية من اجمالي الاصول “الجزء من الكل
ده هيتم مع كل حساب عشان اعرف التغير اللي حصل علي كل حساب وايه اللي زاد وايه اللي قل وزاد او قل بنسبة قد ايه وهل ده كويس ولا لأ وكل ده هيخليني اقدر افهم القوائم افضل واداء الشركة هل الديون بتزيد ولا بتقل والارباح والاستثمارات والسيولة والالتزامات بتزيد ولا بتقل وقائمة الدخل بتفترض ان صافي المبيعات 100% وبتقسم كل البند علي صافي المبيعات وتضرب في 100 هيديك نسبة البند من صافي المبيعات

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى