محاسبة

التحليل المالي بإستخدام النسب المالية

دي من اهم ادوات التحليل المالي واللي فيها تفاصيل اكتر، الفكرة ببساطة هي انك بتاخد رقمين من القوائم وتقسمهم علي بعض وممكن يكون الرقمين من نفس القائمة او قائمتين مختلفين ومن النادر لما تاخد ارقام من قائمة حقوق الملكية، وكل رقمين بتقسمهم علي بعض فده بيكون مؤشر بيقيس السيولة او النشاط او المديونية او الربحية.

التحليل بإستخدام النسب او المؤشرات المالية مفيده جدا خاصتا لو هنعمل مقارنة بمستوى الصناعة أو بالشركة التوب ف نفس الصناعة وده عشان نعرف احنا فين بالنسبة للشركات التانية؟
بتدرس العلاقة بين متغيرين او اكتر من بنود القوائم المالية لنفس الفترة الزمنية بحيث يكون عندنا فهم اعمق للارقام الموجودة ف القوائم المالية او تقدر تقول اننا بنشخص الحالة قبل ما نديها العلاج!

وزي ما قولتلك اهم 3 قوائم: المركز المالي والدخل والتدفقات النقدية

المركز المالي بنقارن ما بين الاصول والخصوم وحقوق الملكية بتعرفنا ازاي الشركة بتمول اصوله

ولو عايز اعرف الشركة بتكسب قد ايه فمن قائمة الدخل فيها ايرادات ومصروفات الشركة والفرق ما بينهم يا ارباح يا اما خسائر والارباح دي يا اما الشركة بتوزعها ع المساهمين او انها بتعيد استثمارها وطول ما في سيولة في النقدية كل ما قدرت الشركة انها تتجاوز اي تقلبات اقتصادية ف المستقبل عشان كده دايما هتسمع من المستثمرين التقال Cash is King

وعشان كده الCash Flow او التدفقات النقدية مهمة جدا لأنها بتعرفنا التغييرات اللي حصلت ع النقدية خلال السنة بتزودنا بتقرير اكتر تفصيلا عن ازاي الشركة بتحقق ايرادات وبالتالي فالتلاعب فيها بيكون اكتر صعوبة من التلاعب ف قائمة الدخل ومع كل المعلومات والارقام اللي جوا القوائم دي فالتحليل بيكون اصعب وهنا المستثمرين بيلجأو للنسب المالية  

وعدد النسب المالية كتير ممكن نختصرهم ف 4 نسب رئيسية:  

1- نسب السيولة
2- نسب الربحية
3- نسب النشاط
4- نسب المديونية

نسب السيولة:
بتعرفني مدي قدرة الشركة علي سداد التزاماتها المتداولة من اصولها المتداولة
وفي كذا نسبة بتقيس السيولة

نسبة التداول= الاصول المتداولة / الالتزامات المتداولة
بتعرفك عدد المرات اللي الاصول المتداولة هتغطي فيها الالتزامات المتداولة وكل ما النسبة دي زادت كل ما زادت امكانية الشركة في سداد التزماتها المتداولة وطبعا ده بيطمن المستثمرين ان الشركة معاها سيولة تواجه اي مخاطر.
وخدبالك من حاجة النسبة المعيارية للسيولة 1:2 وارتفاع النسبة دي مبيدلش علي كفاءة ادارة الشركة لأ طبعا
ده بيدل علي انها مش عارفه توظف فلوسها يعني معاها سيولة ومبتستثمرهاش!

نسبة السيولة النقدية = النقدية + البنك + أ م / الالتزامات المتداولة  
بتعرفك مدي الاعتماد علي النقدية السائلة بعد استبعاد المدينون والمخزون وطبعا كل ده بيفرق مع المستثمر.

نسب السيولة السريعة = الأصول المتداولة – المخزون / الالتزامات المتداولة
بدون اللجوء للمخزون لأنه اقل بند من بنود الاصول المتداولة سيولة واكتر بند معرض لمخاطر انخفاض السعر او التلف او الحريق بنستخدم النسبة دي ف حالة الركود الاقتصادي او البطء ف دوران المخزون خاصتا لما يكون الكمية كبيرة اكتر من اللي السوق طالبه والنسبة المعيارية للسيولة السريعة 1:1

نسب المديونية
بردو مهمة جدا لان الدين هو وسيلة للحصول علي تمويل، وفي كذا نسبة لقياس المديونية
.

نسبة الديون = اجمالي الديون / اجمالي الاصول
كل ما الشركة قللت من اعتمادها علي القروض لتمويل اصولها كل ما كانت المخاطر اقل والافضل انك تستثمر ف شركة مش عليها ديون او ان ديونها تكون قليلة

نسبة الديون لراس المال = اجمالي الديون / اجمالي الاموال المملوكة

نسبة الديون لحقوق الملكية = اجمال الديون / حقوق المساهمين

نسب النشاط
بتعرفك نشاط الشركة بيزيد ولا بيقل وايه مدي كفاءة الشركة ف استخدام اصولها عشان تنتج اكبر قدر ممكن المنتجات او الخدمات

وخد بالك من حاجة لو هتاخد العنصرين من قائمة الدخل بس مفيش مشكلة ولو هتاخدهم من المركز المالي بس بردو مفيش مشكلة اما لو هتاخد عنصر من هنا وعنصر من هنا فكدا في مشكلة!
لازم تاخد بالك منها وهي انك هتاخد المتوسط للعنصر اللي هتجيبه من المركز المالي قيمته من 1/1 +
قيمته في 31/12 وهتقسمهم / 2 وده لان المركز المالي بتجيبلي المركز المالي ل31/12
اما الدخل فبتعبر عن فترة كاملة من 1/1 لـ 31/12

اهم نسب النشاط في كذا نسبة لقياس النشاط:

معدل دوران الاصول = صافي المبيعات / اجمالي الاصول
بتعرفك عدد مرات اعادة استثمار الاموال ف الاصول وكل ما يزيد المعدل ده فده بيدل علي ان الشركة بتحقق حجم معاملات بيتناسب مع حجم اصولها يعني بتعرفك مدي كفاءة الادارة ف استخدام الاصول

معدل دوران الاصول الثابتة = صافي المبيعات / الاصول الثابتة
بتعرفك مدي كفاءة الادارة ف استخدام الاصول الثابتة

معدل دوران المخزون = المبيعات / متوسط المخزون
بيعرفنا عدد مرات دوران المخزون خلال الفترة يعني عدد المرات اللي الشركة بتشتري فيها منتجات وبتبيعها.

معدل دوران المدينين = صافي المبيعات الاجلة / متوسط المدينين
بتعرفنا مدي كفاءة الشركة ف ادارة الائتمان علي تحصيل الديون يعني عدد مرات اللي بتحصل فيها الديون خلال السنة.

وممكن نحسب
متوسط فترة التحصيل = عدد ايام السنة 365 / معدل دوران المدينين

معدل دوران راس المال العامل = صافي المبيعات / متوسط راس المال العامل
بتعرفنا عدد مرات دوران راس المال العامل خلال سنة مالية واحدة

نسب الربحية
فضروري تقارن ما بين صافي الربح اللي اتحقق بحجم الايرادات وفي نسب لقياس الربحية زي
:

نسبة ربحية المبيعات = مجمل الربح / المبيعات
بتوضح العلاقة ما بين سعر المنتج والتكلفة بتاعته وايه مقدار الربح من كل عملية بيع

نسبة صافي الربح = صافي الدخل / الايرادات
بيعرفك كل جنية بيحقق قد ايه صافي ارباح.

معدل العائد علي حقوق الملكية = صافي الربح / حقوق الملكية
بتعرفنا العائد نتيجة استثمار الفلوس بيكسب قد ايه؟

معدل العائد علي الاستثمار = صافي الربح / اجمالي الاموال المستثمرة
بيبن كفاءة الشركة ف استثمار فلوسها.

معدل العائد علي الاصول = صافي الربح / اجمالي الاصول الثابتة والمتداولة
بيظهر مدي كفاءة الشركة ف استخدام اصولها.

وممكن تعرف نسبة اجمالي المصروفات للمبيعات = المصروفات / المبيعات

وممكن نعرف نسبة مصاريف التسويق لو حدها = مصاريف التسويق / المبيعات

وكذلك بالنسبة للمصاريف الادارية والتمويلية

بعد ما اخترنا ال3 شركات وطبقنا عليهم النسب المالية وإتأكدنا من الربحية والسيولة وكله تمام.
تعالي بقي اقولك ازاي تقيم سعر السهم او تحدد سعره اللي المفروض تشتري بيه عشان تقدر تختار افضل شركة فيهم؟

وخدبالك ان سعر السهم بتاعها ف السوق ممكن يكون مبالغ فيه وكده لو اشتريت فدي مخاطرة كبيرة لأن السعر ممكن يهبط وتتعرض لخسارة، فالتحليل بالنسب مش كفاية!

وفي مؤشرات او نسب بنقيم من خلالها الاسهم زي:

مضاعف الربحية (مكرر الربحية) = السعر السوقي للسهم / ربح السهم الواحد
وربح السهم الواحد ده نصيب السهم من ارباح الشركة وهو عبارة عن صافي الارباح / عدد الاسهم

وكل ما كان مؤشر مضاعف الربحية قيمته قليلة كل ما كان افضل وزادت الارباح يعني هتعرفنا المدة اللي هنسترد فيها قيمة السهم وده هيعرفنا اذا كان سعر السهم غالي ولا كويس! ده مؤشر.

وف بردو القيمة السوقية الي القيمة الدفترية = القيمة السوقية / القيمة الدفترية
والقمية الدفترية = صافي حقوق المساهمين / عدد الاسهم

وبردو ممكن من خلال حساب ريع السهم اللي هو معدل الربح الموزع للسهم عبارة عن الارباح الموزعة / سعر اقفال السهم

وبردو من خلال ربحية السهم = صافي الربح القابل للتوزيع / عدد الاسهم العادية
بيظهر القوة الربحية للسهم والنتجية بتكون عبارة عن حصة كل سهم من الارباح لكن خدبالك ان الحصة دي مش بتوزع بالكامل ممكن الشركة تحتجز جزء منها وتوزع الباقي او تحتجزها بالكامل .

اما بالنسبة لتقدير السعر العادل، فاحنا عندنا 3 اسعار:
السعر الدفتري – سعر السوق – السعر العادل

ومقارنة السعر العادل بسعر السوق بيعرفك هل سعره مناسب للشراء ولا مبالغ فيه؟!

وفي اكتر من طريقة لحساب السعر العادل:

قسمة متوسط مضاعف الربحية للسهم / ربحية السهم او تجيب متوسط القيمة السوقية الي القيمة الدفترية وتضرب ف القيمة الدفترية للسهم او تقسم توزيعات السهم العادي من الارباح / متوسط ريع السهم

طبعا لو سعر السوق اقل من السعر العادل بيكون مغري للشراء ولوالعكس فهيكون في مغالاة ف السعر!

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى