” لو مش معاك غير 100 جنيه بس حطهم فى البنك ” كتير من الناس ماعندهاش حسابات بنكية وبتفضل تسيب فلوسها يا أما فى البيت تحت البلاطه .. يا أما بيشتروا بيها حاجات زى دهب أو دولارات .. وفى ناس ممكن تكون بتقبض مرتباتها على فيزا atm وبيحوشوا فلوسهم جوه الفيزا دى !! ومش واخدين بالهم إن ممكن الفلوس دى يستفيدوا منها لو أدخروها فى حساب توفير لأن فيزا المرتبات دى مالهاش عائد من البنك فممكن يكسبوا من فوائد البنك أو ممكن يدخروها على شكل شهادات .. على كل حال هانوضح انهارده إزاى تعرف تفتح حساب فى البنك وهانعرفك على الفوايد البنكية بأنواعها والشهادات. . . .
لو مش معاك غير 100 جنيه بس حطهم فى البنك
هنتكلم دلوقتي بالتفصيل عن :
- إيه أفضل البنوك الـ ممكن أفتح فيها حساب ؟
- طيب مميزات البنوك الأجنبية إيه ؟؟
- الأوراق المطلوبة لفتح الحساب ؟؟
- أنواع الحسابات ؟
- أنواع فائدة البنك ؟
- الفائدة بتتحسب أزاى ؟
- طيب ايه شهادات الاستثمار دى ؟؟
إيه أفضل البنوك الـ ممكن أفتح فيها حساب ؟
نفضّل أنها تكون بنوك مصرية زى ( البنك الأهلى المصرى أو بنك مصر أو بنك القاهرة ) والبنوك دى بتتميز بحاجتين ..
الأولى : إن فروعهم كتير جدا ..
- Advertisement -
الثانيه : ان الرسوم السنوية مش مبالغ فيها زى البنوك الأجنبية الـ منهم ( البنك التجارى الدولى , البنك الأهلى القطرى , بنك عودة … ).
كذلك الرسوم السنوية للبنوك المصرية غالبا بتكون 120 جنيه مصرى.
أما رسوم البنوك الأجنبية بتكون مابين 150- 200 جنيه على حسب كل بنك.
طيب مميزات البنوك الأجنبية إيه ؟؟
طبعا بيكون التعامل فيها جيد جدا للعميل ده بالإضافة إنها مش بتكون زحمة زى البنوك المصرية.
كذلك فيها مميزات لخدمات أكتر زى تحويل فلوسك من حساب لحساب أون لاين ..
- Advertisement -
الأوراق المطلوبة لفتح الحساب ؟؟
*بطاقة الرقم القومى.
*شهادة إثبات دخل لمن هم فوق 21 عام ومن هم أقل من 21 عام أو طالب شهادة إثبات دخل ولى الأمر.
*1000 جنية مصرى ( وطبعا ممكن تسحبهم أول يوم بس لازم أول مره تفتح حساب تودع 1000 جنيه ).
ولو هاتفتح حساب بالدولار فهيكون 100 دولار أو مايعادلها لو هاتفتح الحساب بأى عملة اخرى.
أنواع الحسابات ؟
الحسابات نوعين :
الأول : الحساب الجارى وده المبالغ الـ هاتودعها مش هاتقدر تاخد عليها فايده أو عائد البنك وبيفتحه معظم الناس الـ بيكون تعاملاتها عن طريق الشيكات لان من خلاله تقدر تطلب من البنك دفتر شيكات …
الثانى : حساب التوفير وده أفضل نوع لو عايز تفتح الحساب للإدخار لان من خلاله تقدر تستفيد من فايدة البنك …
لو مش معاك غير 100 جنيه بس حطهم فى البنك وأنواع فائدة البنك ؟
الفايدة يا أما شهرية (يعنى هاتنزل كل نهاية شهر ) أو 3 شهور أو 6 شهور أو سنة.
وطبعا كل مايكون مدة نظام الفايده لفترة أطول كل ماهيكون العائد اكبر.
يعنى فى المتوسط كدا الفائدة الشهرية بتكون 6.65% والفائدة لـ 3 شهور بتكون 6.85% والفائدة لـ 6 شهور بتكون 7.05% والفائدة السنوية بتكون 7.25 %
الفائدة بتتحسب أزاى ؟
كذلك الفايده بتتحسب على المبلغ الـ بيمر عليه شهر كامل فى البنك يعنى من اول يوم حتى أخر يوم فى الشهر.
وطبعا نسبة الفايده دى بتكون للسنة مقسومة على عدد اشهر نظام الفايده …
بمعني مثلا لو اودعت 10 ألاف جنيه واختارت نظام الفايده الشهرية الـ نسبتها 6.65 % مش هيكون العائد
10000*6.65/100 = 665 جنيه للشهر
لان الفايده دى للسنه فالبتالى لازم نقسم على 12 عشان نطلع العائد الشهرى يعنى طريقة الحساب هاتكون كدا
10000*6.65/100 / 12 = 55.4 جنيه
وهيا دى فايده الشهر من مبلغ 10 ألاف …
كذلك خلى بالك لو سحبت فلوسك قبل مثلا يوم 29 او 30 يبقى كده انته ضيعت الفائده على المبلغ المسحوب والبنك هيحسب الفايده بس على المبلغ الـ موجود من بداية الشهر لغاية نهايته.
وكده نكون انتهينا من موضوع ” لو مش معاك غير 100 جنيه بس حطهم فى البنك “.
طيب ايه شهادات الاستثمار دى ؟؟
شهادات الاستثمار دى فى الوقت الحالى هى أعلى عائد فى كل البنوك ليه ..
لان مثلا لو اتكلمنا على الشهادات البلاتينية فدى الفايده بتاعتها 12.5 % وقيمة الشهادة الواحدة ألف جنيه.
بمعني لو معاك 10 الاف جنيه ممكن تقدر تشترى 10 شهادات بس.
من عيوبها بقه فلوسك البنك بيحجزها وماتأقدرش تسحبها الا بعد مرور 3 سنين بس ممكن تكسر الشهادة وتاخد فلوسك بعد 6 شهور لو مش حابب تكمل بس أكيد البنك هيخصم من فلوسك جزء من مبلغ الفايدة.
وبكده نكون وصلنا لنهاية مقالنا النهارده ” لو مش معاك غير 100 جنيه بس حطهم فى البنك “.
متنساش تتابع قسمنا تأسيسي عشان تعرف مواضيع أكتر هتساعدك تزود دخلك.
كذلك تابع صفحتنا علي الفيس بوك من هنا :
