ممكن تكون سمعت قبل كده عن حاجة اسمها “مؤشرات الأسهم” زي فوتسي 100، وداو جونز، ونيكاي 225، الأرقام دي بتبان في النشرات الإخبارية والصفحات الاقتصادية في الجرايد، وبيكون ليها قيمة بتوضح لو كانت الأرقام دي صعدت أو نزلت، هنتكلم أكتر عن مؤشرات الأسهم وأهميتها وايه هي المؤشرات الرئيسية في دول العالم وازاي تقدر تحسبها، كمان هتعرف ازاي بيتم تداولها في سوق البورصة.
استثمارك الأكبر هو في قدرتك على اختيار أسهم كويسة مع البقاء فيها لفترة طويلة.
وارن بافيت
إقرأ المزيد: البيع على المكشوف: دليل شامل للتداول في الأسواق المالية
مفهوم مؤشرات الأسهم
بكل بساطة مؤشرات الأسهم هي عبارة عن أدوات بتُستخدم لقياس وتتبع أداء السوق المالية وتحركات الأسهم المدرجة فيها، والمؤشرات دي مهمة جدًا للمستثمرين والمتداولين لإنها بتساعدهم على تحليل وفهم حركة السوق واتجاهات الأسهم.
المؤشر بيقيس قيمة جزء معين من سوق الأسهم
يعني ممكن يكون الجزء ده هو بورصة معينة زي بورصة طوكيو أو ناسداك، أو ممكن يكون منطقة معينة زي أوروبا أو آسيا، أو ممكن يكون قطاع معين زي الطاقة، الإلكترونيات، أو الأملاك العقارية.
مثلا، فوتسي 100 بيعبر عن أكبر 100 شركة متداولة في بورصة لندن، لو ارتفعت أسعار أسهم الشركات دي بمعدل معين، ففوتسي 100 هيزيد هو كمان، ولو نزلت أسعار الأسهم هينزل هو كمان.
أهمية مؤشرات الأسهم؟
المؤشرات بتدي إشارات للناس اللي بيتداولوا في البورصة أو اللي بيستثمروا فيها عشان يعرفوا إيه الحالة العامة للبورصة، أو للمنطقة، أو للقطاع اللي هما فيه.
يعني مثلا الـ “إي إس إكس 200” هو مؤشر بيتابع أداء 200 شركة كبيرة في أستراليا، ولو ارتفع الـ “إي إس إكس 200” يبقى أداء الشركات دي كويس، يعني ارتفاع الـ “إي إس إكس 200” بيبان للمستثمرين إن حالة البورصة الأسترالية بتتحسن بشكل عام، وارتفاع البورصة الأسترالية بيبين إن الاقتصاد الأسترالي كله كويس، وبكدا حركات أسعار الأسهم الرئيسية بتدي إشارات للناس إنهم يقدروا يعرفوا إيه الحالة العامة للبلد.
مؤشرات الأسهم الرئيسية؟
في أغلب الدول بيكون فيها مؤشر للأسهم واحد بيتابع أكبر الشركات في البلد دي، زي مثلا:
- “إيجى إكس 30 (EGX30)” في مصر.
- “فوتسي 100” في المملكة المتحدة.
- “داكس” في ألمانيا.
- “كاك 40” في فرنسا.
- “ايبيكس 35” في إسبانيا.
- “هانج سنغ” في هونغ كونغ.
- “نيكاي 225” في اليابان.
- “فوتسي ميب” في إيطاليا.
- “تي.إس.إكس 60” في كندا.
- “إي.إس.إكس 200” في أستراليا.
مؤشر داو جونز الصناعي (DJIA)
مؤشر داو جونز الصناعي هو واحد من أقدم وأشهر المؤشرات الموجودة، وهو شامل 30 شركة من أكبر الشركات اللي بتأثر في الاقتصاد الأمريكي، المؤشر ده تم حسابه لأول مره سنة 1896، وكان بيتكون من شركات كانت بتشتغل في الصناعات التقيلة، بس المؤشر ده بطل يربط بينه وبين الصناعات التقيلة دلوقتي.
مؤشر اس آند بي 500 (S&P 500)
الـ اس آند بي 500 بيتكون من 500 شركة كبيرة في بورصة نيويورك (NYSE) أو ناسداك، وده أكتر تنوع من مؤشر داو جونز الصناعي، الـ اس آند بي 500 تم استخدامه في الخمسينيات وهو بيمثل حوالي 70% من قيمة بورصة الولايات المتحدة الأمريكية.
مؤشر نازداك 100 (NAS100)
نازداك 100 مؤشر بورصة أمريكي اتأسس سنة 1985، وبيتكون من أكبر 100 شركة غير مالية في بورصة نازداك في نيويورك، المؤشر ده بيمثل شركات في مجالات مختلفة زي الحواسيب، الاتصالات والتقنية الحيوية.
إزاي تحسب مؤشرات الأسهم؟
بنحسب مؤشرات الأسهم عن طريق نظامين:
- نظام الرسملة المرجح.
- نظام السعر المرجح.
نظام الرسملة المرجح
الرسملة “Capitalization” معناها إن ممكن تحسب قيمة أي شركة بضرب سعر سهمها في عدد الأسهم اللي بتملكها الشركة، والنظام ده بيُستخدم في غالبية مؤشرات الأسهم، وبياخد في الاعتبار حجم كل شركة لما بيحسب قيمة المؤشر كله، يعني كل ما زادت قيمة شركة معينة، كل ما كان ليها تأثير أكبر في سعر المؤشر كله.
فوتسي 100 بيتم احتسابه بالطريقة دي، يعني مثلا لو حجم شركة بريتيش بيتروليوم كان ضعف حجم شركة باركليز، فأي تغيير في سعر سهم بريتيش بيتروليوم هيأثر على فوتسي 100 بمقدار الضعف، بالمقارنة مع تغيير مماثل في سعر سهم باركليز.
–> كمان في مؤشرات تانية بتستخدم نفس النظام، زي إس آند بي 500، نازداك 100، هانغ سانغ، كاك 40، ايبيكس 35 وإي إس إيكس 200.
نظام السعر المرجح
الطريقة دي بتعتمد على سعر السهم الفعلي بتاع الشركات اللي مُدرجة في المؤشر، مش على حجمها الكلي، فكل ما زاد سعر السهم، زاد تأثيره في قيمة المؤشر، يعني لو سعر السهم بتاع شركة بيوصل 100 دولار، فتأثيره في المؤشر بيكون 5 مرات أكتر من شركة تانية بسعر السهم 20 دولار بس.
–> المؤشرات اللي بتستخدم النظام ده هي مؤشر داو جونز الصناعي ونيكاي 225 بس.
إزاي يتم تداول مؤشرات الأسهم؟
عشان مؤشرات البورصة مجرد أرقام ومتقدرشي تشتريها ولا تبيعها بشكل مباشر، لازم تختار منتج بيعبر عن أداء المؤشر ده، وفيه حاجات تقدر تستخدمها زي:
- الصناديق المتداولة المرتبطة بالمؤشر: هي صناديق استثمارية مُتخصصة بتحاول تقليد حركة مؤشر سهم معين، وممكن تستثمر فيها عن طريق مدير الصندوق.
- صندوق المؤشرات المتداولة (ETF): هي نوع من الصناديق المرتبطة بالمؤشرات، اللي بتقدر تتداولها زي الأسهم في البورصة، سعر ETF بيتغير طول فترة التداول، أكبر ETF في العالم دلوقتي هو SPDR S&P 500 اللي بيتبع مؤشر S&P 500.
- المشتقات: هي حاجات مالية تتبع سعر أداة مالية أساسية زي العقود المستقبلية والخيارات والديجيتال 100 والعقود مقابل فروقات الأسعار (CFDs).
في النهاية
كل المؤشرات اللي اتكلمنا عنها هي مجرد أدوات بتساعدنا نفهم الحالة العامة للبورصة وتحركات الأسهم، لكن القرار النهائي بخصوص التداول بيعتمد على دراسة مستفيضة وتحليل للشركات المعنية والعوامل الاقتصادية والسياسية اللي بتأثر عليها، التداول في البورصة بيحتاج دراسة ومعرفة مستمرة، ولازم ناخد القرارات بناءًا على معرفتك الشخصية واستشارة الخبراء في المجال ده لو احتجت ده.
مهم: الأسهم والتداول: اعرف أساسيات الأسهم وتداولها في البورصة
استثمار الأموال في البورصة ممكن يكون فرصة كويسة عشان تحقق العائد المالي اللي محتاجه، لكن لازم الاول تتعلم وتتدرب كويس وتكون واعي للمخاطر المرتبطة بالنوع ده من الاستثمار.
