ناس كتير مش مرتاحة فى شغلها ونفسها تخلع منه لحاجة اعلى وأحسن وأريح ، ولكل واحد أسبابه المختلفة ، لكن الكل بيشترك فى لحظة الحرج بتاعت ” انا همشي ياجماعة وأسيب الشغل ” خصوصاً لو الإستقالة ملهاش أسباب قوية زى ” خناقة مع المدير ” مثلاْ ، أو تقصير كبير وغلطة منك خلتهم يخصمولك جزء كبير من مرتبك ، أو حتى لان مرتبك متأخر بقاله قرن ولسه مقبضتش ، وفى الحالة دى لازم إستقالتك تبقا بشياكة ، علشان تقدم السبت لو لاقدر الله إحتجت الشغل ده في اى وقت تانى ، وزي المثل مابيقول ” اللى متحتاجش وشه النهاردة بكرة تحتاج قفاه ” عشان كده هنعرفك النهاردة ازاى تستقيل من شغلك بشياكة ..
ازاى تستقيل من شغلك بشياكة
إقرا الكام سطر اللى جايين دول :
أول حاجة
– لازم تكون متأكد مليون فى المية من قرارك الأول قبل أى خطوة علشان مترجعش تندم أو تضطر ترجع فى الاستقالة ويبقا شكلك وحش …
تاني حاجة
– لازم توضح لصاحب الشركة أو المدير المسئول سبب الإستقالة ومتسيبش الدنيا سايحة كدة … علشان لو حبيت ترجع فى يوم من الأيام ..
- Advertisement -
تالت حاجة
– متخليش الأسباب كتير ومتفرعة ومن الشرق والغرب .. حاول تخلى الإستقالة مسببة بسبب واحد بس قوى علشان محدش يشكك فى قرارك ويحاول يرجعك فيه ، وكمان حدد تاريخ اليوم اللى هتتوقف فيه عن العمل بالظبط عشان تقدر تحفظ جميع حقوقك وحقوق الشركة المادية والأدبية.
رابع حاجة
– خلى عندك ضمير وأمانة فى تسليم الشخص اللى هيتولى منصبك بعدك واوعي تخفي اسرار أو تفاصيل ومتبخلش عليه بأى نصيحة ودايمًا افتكر انك هتتعرض قريب لموقف زى ده فى شغلك الجديد وهتبقي عامل زى الكتكوت المبلول..
خامس حاجة
– وأنت ماشي فى اليوم الأخير لازم تشكر كل الناس اللى اشتغلت معاهم على الملأ حتى لو كان عندك مع بعضهم مشاكل … ده بيسيب عنك انطباع كويس وكل حاجة بتتنسي ،
وخليك فاكر ان المجال اللى بتشتغل فيه مهما كان واسع وكبير فهو فى الآخر دايرة مقفولة متعرفش هتحتاج مين امتي ..
سادس حاجة
– أخيراً .. نصيحة مهمة لو انت مستقرتش على شغل بديل قبل تقديم الإستقالة لازم تصبر لحد ماتأمن نفسك بدل ماتلاقي نفسك فى الآخر قاعد بالفانلة الحمالات بتتفرج على وائل الإبراشي لحد الفجر ..
- Advertisement -
كمان في مواضيع اكتر وفّرناها ليك عشان تقدر تستفاد منها في قسم :
انضم لينا بردو علي صفحة الفيس بوك عشان يوصلك كل جديد أول بأول :
